La Danza en Barros

Bien pensaba que nun yera capaz de retornar a esti espaciu. Fai yá unos años, allá pol 2013, faía esta entrada nel blog sobre La Plazuela de Barros (http://cantardefilomena.blogspot.com.es/2013/03/la-plazuela-de-barros.html) y quedaba entones nel tinteru'l poder falar de la danza que s'entama'l llunes de la fiesta patronal, el día de La Concencionina. Como tamos n'agostu y queda menos d'un mes pa eses feches aprovecho y retomo equí. Como dicíamos ayeri…….

Cuando en Llangréu recibimos la visita de xente de fora del conceyu, yá sía del restu d'Asturies o de cualesquier otru llugar, siempres nos comenten la dificultá que tien l'estremar en que parte del conceyu tamos. Y la verdá ye qu'ensin conocer bien les distintes villes y pueblos, resulta un pocu enguedeyosu, pola linealidad del cascu urbanu, estremar onde acaba unu y empieza el siguiente.

Pero entá conociendo onde s'atopa la llende oficial, siempres van apaecer opiniones reclamando unos metros más per parte de cada parroquia. Este ye'l casu ente Barros y La Felguera. Magar con Riañu, que los sos llindes permanecen inmutables dende antaño na zona d'El Pantanu y La Barraca, pase la carretera por onde pase y edifíquese por onde s'edifique, el casu de La Felguera representa lo contrario. Anguaño esti aparenta tar na zona del Puente Llago, va unos años na carretera que crucia'l Molín d’Argüelles, y con anterioridá entá más enriba.

Fai gracia entá anguaño escuchar a los mayores aldericar sobre onde s'atopa “la raya”, y siempres me llamó l'atención unu de los argumentos que se remanen pa reclamar el terrén ganáu por La Felguera “moderna”, al vieyu pueblu de Barros, qu'antes de la industrialización nada tenía qu'envidiar a la parroquia de Santolaya de Turiellos, xerme de nueva villa felguerina: “La Danza siempres llegó hasta l'altor d'El Nitrógeno”. En más d'una ocasión y en medio la discusión sobre onde empieza unu y termina la otra esi argumentu acaba saliendo.

El llunes dempués del últimu domingu d'agostu ye recordáu pola xente de Barros como'l día de la Danza. Dempués de la misa por socios finaos y el concursu de baille a lo suelto, que dexó d'entamase va dellos años nel so formatu espontaneo y tradicional, la banda de música encabezaba la marcha en dirección a La Felguera de la danza de pozaricos y pozariques coyíos de la mano. Nun correspuende a un tipu de danza zarrada, pero tampoco abierta. En realidá trátase de dos files enfrentaes que circulen pelos marxes de la carretera coles cabeces al llau de la banda de música y que cierra na cola cola unión de los postreros participantes dambes. Los informantes d'edá comenten que cuando la cabeza de la danza taba llegando al Molín d'Argüelles, entá nun se cerrara per tras en La Plazuela. Non se si va ser verdá o a cencielles una visión un pocu idealizada pero los que siendo neños pudimos ver la danza entá en plenu apoxéu nos años setenta casi podemos dar testimoniu de veracidá.

 

Anque al acompañar a la banda nun principiu fai que los participantes avancen al so ritmu brincando o a cencielles andando, tanto nes paraes como nes zones onde la banda nin se ve nin s'escucha, cantares tradicionales y el pasu de danza característicu escontra alantre y tras taben presentes en tol percorríu. El cantar pa danciar d'esa manera yera'l del popular estribillu de “La Molinera”. Ente los cantaores más recordaos nel pueblu destacó nos años sesenta y setenta “Pepe'l de La Morena” qu'improvisaba cuartetes cargaes d'humor y alcordanza al pueblu de Barros y les sos xentes.

La danza llegaba hasta El Puente Llago, siguía hasta l'encruz del Molín d'Argüelles y terminaba nel encruz d'entrada a la factoría d'Explosivos Río Tinto (El Nitrógeno), reivindicando la llende del territoriu pozaricu.

Falo de La Danza en pasáu porque como fenómenu social y d'alta participación espontánea y popular per parte de la xente de Barros va años que podría dase por perdida, pos anque la danza, al igual que'l concursu de baille, entá se cellebren nes fiestes actuales, queden como pequeñu recuerdu de lo que foi en desesperaos intentos por paecese a aquellos.

L'amor de Barros a la so Danza vese reflexáu de manera especial nes colecciones fotográfiques dende va décades. En cualquier esposición de semeyes populares de Barros, un porcentaxe eleváu correspuenden a La Danza.

Los oríxenes nel tiempu de esta costume mereceríen un estudiu a parte pero lo que sí ta claro ye la so enorme popularidá y tradición mientres el sieglu XX que se ve reflexáu en cómo s'anunciaba y entá güei anúnciase nos programes de les fiestes: “TRADICIONAL DANZA PRIMA. Arguyu de los pozaricos y almiración de los foresteros”

Volviendo de la güerta

La memoria suel fallanos, y munches vegaes atopes oxetos que nun recordabes. Buscando ente apuntes y documentos de va años, que pueblen esi caxón que toos tenemos, onde va a parar tou aquello que nun queremos tirar, pero que rares vegaes nos ponemos a ordenar, atopo con una fueya de papel cuadriculáu, arrincada d'una llibreta, con encabezáu:

“Barros. 8 Agostu 1992. Filomena Álvarez. Cantares pa baillar a lo lixero”.

Y claro, recuerdo'l momentu en que Mena, a pesar de que mio madre o los médicos encamentáren-y tranquilidá y vida reposada, volvía de la güerta bien entrada la tarde tres un día de nun parar de trabayar al sol.

Esi día, al igual qu'otros munchos, sentábase a reposar a la solombra de el pumar al pie de la güerta y si venía-y a la memoria dalgún cantar, apuntábalu a la so manera nun cachu de papel, por que nun s'escaeciera al llegar a casa.

Yá comentábamos va tiempu que les sos habilidaes cola escritura nun yeren les d'un rotulista góticu, pero solu con apuntar les primeres pallabres de cada cantar sobrába-y pa dempués recordalos ensin problema.

Aquel día viniéronse-y a la cabeza cantares pa baillar a lo lixero, d'aquellos que Reja “La Florina”, vecina de La Follaca, cantaba cuando vivíen en El Cadabal. Los cantares y l'estribillu son conocíos pos son abondo populares, pero déxolos equí tal como me los cantó esi día:

La vieya la mio suegra

Diome unos clavos

Cada vez que reñimos

Toi por clava-y los

Ai! Morena, los mios amores van

Ai! Salada, la nueche de San Xuan

La vieya la mio suegra

Diome unos cuadros

Cada vez que reñimos

Los descolgamos

Ai! Morena, …………

Una moza na fonte

Dixo a un calderu

Oxalá te vovieras

Mozu solteru

Ai! Morena, …………

El calderu  responde

Con disimulu

Calla gocha,marrana

Y frégame el culu

Ai! Morena, …………

Fue una de les poques ocasiones que Mena me cantó al completo la pieza.

La semeya qu'encabeza'l testu ta tomada al entamu de los años 60. Pepita Antuña (Los Milanos –Llangréu) bailla con un familiar, el día de la fiesta, a la sobremesa.

D'agüeyamientos va l'asuntu

Como yá cuntaba n'ocasiones anteriores, la mio infancia de ruin comedor acababa cola paciencia de la xente de la mio casa. Un neñu con poques ganes de comer vese casi siempres débil ante los güeyos d'una madre o una güela, anque s'atope perfeutamente y tolos médicos del país lo firmaran en declaración xurada. Tres les normales visites al pediatra, la cosa entá nun quedaba clara, y como la medicina dicía que nun teníes nada que nun se curara cola paciencia o los cambeos hormonales de la crecedera, había que tomar una midida drástica, pasar l'agua. Si señor, tabes agüeyáu.

Bonu, digamos qu'igual paseme un pocu col sarcasmu, pero la creencia popular nel dañu causáu pol agüeyamientu perdura hasta los nuesos díes. Como yá comenté otres vegaes, Mena yera atea total, nin dios, nin santos, nin cures, sicasí, al igual que la inmensa mayoría de les xentes de la so dómina, la creencia en temes como l'agüeyamientu oldeaba en cierta forma cola so naturaleza antirrelixosa. Una cosa yera la relixón impuesta y otra la tradición heredada.

Asina que pasé la infancia escuchando hestories de madres con neños que nun paraben de llorar y que en pasándo-yos l'agua dormíen plácidamente, animales que pasaben de tar baltaos na corte a pastiar fuertes nel prau o adultos con fories y gran malestar reincorporándose a los sos queferes totalmente restablecíos. O ensin saber qué misión tenía aquel vasu d'agua que la mio madre o Mena traíen de casa d'una vecina y yo debía de beber en nueve sorbos.

La realidá indica que los síntomes del agüeyamientu encaxen de normal con cuestiones psicolóxiques, remor o nerviosismu y pol fechu de creer na cura milagrosa, l'afectáu siéntese meyor debíu al efeuto placebo. Munchos van pensar, ¿y cuando se trata de neños que nun son conscientes, o animales?, con éses, munches vegaes asocede aquello que dicíamos de primeres, nun ye'l presuntu afectáu'l que tien el mal, ye l'observador el que piensa que lo tien y una vegada concluyíu'l ritual, ve d’otra manera al agüeyau.

El pasar l'agua ye'l métodu más común y popular na cultura asturiana y llega frescu a los nuesos díes. La “curiosa” que quita'l mal, sueli ser una vecina o persona de la redolada familiar que tien el “don”. Esti vien dáu de normal por trespasu de xeneraciones anteriores, que-y enseñen l'esconxuru y el ritual a la persona que ven más apta y que disponga d'una bona predisposición y verdadera creencia nel mal y nel so sanamientu. Nes últimes décades ta desvirtuado en gran midida pola apaición de “espertos” que cobren polos servicios y afaten el protocolu hasta rituales  que nada tienen que ver cola manera tradicional d'Asturies. Quien quita'l mal, tien de faelo de forma desinteresada, pola voluntá o en cuenta de pequenos detalles de cortesía.

Si nun ta presente l'afectáu, una prenda va sirvir como sustituta nel ritual. Como únicos elementos, un vasu, agua, un tenedor y lo más importante, el cachu de cuernu de venáu. Esti puede variar en tamañu y forma pero lo normal ye que nun supere los 4 o 5 cm. Quien quita'l mal pon agua fresa nel vasu, pasa repitíes vegaes el cachu de cuernu pol afectáu, o la so prenda, mientres recita pa si parte de les oraciones, reza escontra dientro o se persigna casi dando'l llombu a los presentes, y empieza a faer cruces sobre los cantos del vasu, mientres bisbisa l'esconxuru ensin que s'entienda nada de lo que diz. Al concluyir, suelta'l cuernu na agua y esti va al fondu. Y esti ye'l momentu de máxima espectación. El cachu de cuernu arrodiase de burbuyes que-y queden xuntaes a la so superficie. Son los güeyos que tán causando'l mal. L'afectáu esta agüeyau. De siguío, col tenedor, va pinchando “los güeyos” qu'arrodien al cuernu y va moviendo hasta que quede llimpiu. El mal ta controláu, pero l'afectáu tien de beber l'agua y lo más normal ye faelo en nueve sorbos. Quien quita'l mal fai una apreciación del grau de gravedá del afectáu, que valoraba mientres esaminaba'l númberu, el tamañu, la disposición de “los güeyos” o si l'agua vuélvese más o menos turbia. Puédese nun tar “agüeyau”, talo pocu o enforma, o yá nel peor de los casos “acodiciáu”.

Dende tiempos  de los antiguos exipcios y sobremanera na cultura romana'l símbolu de la “cigua” yera'l meyor amuleto contra l'agüeyamientu. D'ende llega a la nuesa cultura l'usu de la “cigua” d'acebache. La mano negra col puñu apertáu y col pulgar saliendo ente l'índiz y el corazón faciendo la “figa”. Priéndese-y a los neños dende'l trubiecu, y yá de mayores, ye habitual l'usala per gran parte de la xente, crea nel agüeyamientu, como amuleto de bona suerte o a cencielles como adornu. Tantu na cultura asturiana como n'otres foi normal dende antiguu, el faer el xestu de la “figa” ante la presencia de los sospechosos de causar el mal. Y si acompañes el xestu dirixiendo la mano contra les nalgues y bisbisando “Llámbime'l culu”, “Besame  el culu” “Qu'el mal que deseyes sobre ti vuelva” o similar, la protección va ser enforma mayor.

Conmigo traigo una cigua desque nací. Porque como dicía Mena “Nin dios, nin santos, nin cures, pero col agüeyamientu de la mala xente, hai que tener cuidáu. Por si acasu”

Cifres y lletres

Yá lo sé, yá lo sé, toos tabais pensando !Esti yá nun escribe más! ¡Tanto cuentu de primeres y agora nada! Pos equí toi de nuevu. El branu un pocu aceleráu y la vida llaboral casi acaben cola mio cordura, pero a la fin tengo un pocu de tiempu y puedo siguir por onde lo dexamos.

Va poques selmanes qu'empezó'l cursu escolar. Un fechu que nos paez común polo cotidiano que resulta, pero que poco que paremos a pensar, daqué en realidá relativamente modernu.

El conceutu actual d'escolarización nun podríamos aplicalo más allá de mediaos del pasáu sieglu. Ente les clases populares y en sobremanera nes zones rurales, yera del tou común que los neños asistieren, si ye que lo faíen, d'una manera bien irregular a la escuela, siempres en función de les necesidaes de la so presencia nos llabores y trabayos cotidianos. Llegábase d'esta miente a una especie d'alfabetización  de mínimos, consiguiendo na mayoría de los casos el llegar a lleer y escribir con dificultá o a remanar tolo más a sumar y restar.

Mena cuntaba con gracia la so esperiencia cola escuela. Nun recordaba cuanto tiempu nin cuantes vegaes asistió, lo que si tenía claro ye que fueron bien poques. La risa brotába-y cuando cuntaba que'l primer día sentóse enriba del Silabario”, el llibru que daquella empecipiaba a los infantes na llectura y en xuntar lletres. La risa tornaba siempres n'amargura al recordanos la miseria d'aquelles infancies castigaes al trabayu prematuru y a la falta d'oportunidaes formatives.

Dende bien llueu los neños y neñes de les zones rurales teníen como responsabilidá y trabayu principal el curiar el ganáu mientres pastiaba. Por eso'l llevantase ceo, percorrer caminos solitarios y enfrentase solos al cuidu del ganáu, foi normal hasta nun fai tantu na nuesa redolada rural.

Al volver a casa siguíen col trabayu, los neños ayudando a cebar les vaques y les neñes na cocina o curiando d'hermanos más pequenos.

Mena y el so hermanu Vicente nun llegaben a los diez años cuando s'encargaben de curiar el ganáu nel monte a diariu. Otros neños y neñes de la so redolada faíen lo mesmo nos praos  del so alredor.

Asina día tres día y al volver a casa entá tou lo qu'había que faer. Asina yera que Vicente tenía que xubir solu a la tenada a baxar yerba pol bocarón al preselbe de les vaques. Un neñu d'esa edá y tres esi día intensu de trabayu tenía enforma mieu d'entrar solu na tenada. L'inxeniu de Mena y Vicente fíxo-yos dase cunta que cuando llovía y moyábense, al llegar a casa, al nun disponer de ropa pa camudase, tres reña y palos metíenlos na cama directamente por que la ropa ensugara p'a otru día.

Por eso, cuando'l tiempu taba malu, pero nun llovía enforma, metíense debaxo de los árboles y movíenlos con fuerza pa moyase arremente y asina llegar papaos a casa y evitar que'l probe rapazín tuviera que xubir a la tenada. A pesar de la reña y los palos, dambos preferíen esto, él por nun pasar mieu y ella por nun ver sufrir al so hermanu.

Magar tou esto, cuando daquién tien capacidá y dispón de celebru inquietu, nun hai nada que lo torgue. Mena aprendió a lleer con solo aquelles pequenes visites al colexu, preguntando a otros como faelo correutamente, y lo más sorprendente de too, a sumar y restar afitándose nel tenderu onde mercaba, mientres esperaba vez y esti echaba les cuentes de veceros anteriores.

Asina que alcuérdome a Mena apuntando na so llibreta de pintes Miquelrius les cuentes de la vienta de la lleche, o los aforros y gastos. Magar la fluidez y la caligrafía nun llegaben al nivel de lo qu'agora tamos avezaos, pudo tola so vida defendese coles cuentes, aportar a la llectura, y en definitiva entender ensin dificultá'l mundu que nos arrodia.

Por eso quiero empezar esta nueva temporada recordando lo importante que ye l'accesu a una educación de bona calidá. Como la mio güela Mena pudo llegar a onde llegó na so auto-alfabetización y a onde podría llegar de tener la oportunidá dende neña a tener un bon recursu educativu.

Viendo los tiempos que cuerren y “gracies” a les nueves polítiques educatives, nun tardara en volver la situación de metese so los árboles a pillar el remoyón. Y eso, non.

Tantu cura, tantu cura

Tantu cura, tantu cura.

Tantu fraile, tantu fraile.

Tanta muyer sin marido.

Tantu rapacín sin padre.

¡Yá tán esos cuervos otra vez!. A cada apaición na televisión, periódicu o revista del Papa, obispu o simple cura, esti yera'l rancer de Mena. Los cures, nin de llueñe.

Y yera d'entender. La represión mientres la post-guerra y los años del réxime, diba acompañada de la indixebrable Ilesia Católica Apostólica y Romana. Nun fueron años fáciles pa la familia de Mena, como pa tantos y tantos otros, que sufrieron les consecuencies de pensar de forma distinta a la que s'impunxo mientres casi cuarenta años.

La institución qu'entá anguaño atrévese a dar opinión sobre moral ensin conocela en dos mil años d'hestoria, nun s'escapó nunca de la crítica popular, que como quien nun quier la cosa, aprovecha dende siempres los cuentos, el cantar y la música pa colar dalguna qu'otra puya.

Y claro, los cures y el so doble moral, pónenles siempres que nin pintaes. Quien nun conoz hestories de cures encamaos cola ama, famionos, encegolaos col sexu nos confesionarios y fora d'ellos. Basta con echar una güeyada a los medios d'información de los últimos años y salimos de duldes.

Ente los cantares de Mena atopamos dellos dedicaos a los cures y los sos “vicios ocultos”.

D'esa relación tan estrecha cola ama.

El cura díxo-y al ama:

Échate a los pies cordera.

Ella entendiolu al revés,

y echose a la cabecera.

El cura díxo-y al ama

que se acostara a los pies.

Echose a la cabecera

ye que lu entendió al revés

El cura vender vendió,

vendió la burra que andaba,

y agora pa dar les mises,

va montáu enriba l’ama.

Munches vegaes, falase de cures de sitios que nun los tienen  como'l casu de La Paranza,  qu'a cencielles ye una casería de Siero. Asina nun se cuerre peligru de personalizar.

El cura de La Paranza

de una hostia mató un mozu.

Y dempués que lu mató,

metió les manes en bolsu.

El cura de La Paranza

y el sacristán del Llorío

por correr tras de una moza

cayeron xuntos al río.

O por rise de la so condición.

El señor cura nun baila

porque diz que tién corona.

Baile señor cura baile,

que Dios todo lo perdona.

El señor cura nun baila

porque diz que tien güevera.

Baile señor cura baile,

baile cola minga fuera

Y claro, esa mirada del cura libidinosu.

El señor cura mirome.

Dixome que era galana.

Y yo dixe ¡Señor cura!,

eso nun-y importa nada

Y anque el cura tea por mediu, la fama siempres acaba cargando sobre la misma.

El cura va pal molín.

Lleva la chocolaterá,

pa batir el chocolate,

cola probe molinera.

Amores y dolores

Mena 1931

Amores y dolores

quitan el sueño.

Yo como no los tengo

descanso y duermo.

Víamos n'otres ocasiones, como al traviés de coples y cuartetes aprovechábase p'amosar despecho y rabia con antiguos amores o contra la non correspondencia del amor deseyáu. Pero antes de llegar a esos estremos, la llírica popular acompanga al namoráu que solo ve coses bones nel bien que ansía y esmolezse por él. Ente los cantares de Mena atopamos los siguientes:

Los que se refieren a la entrega:

Amante si fueras firme,

como el sol en el verano,

yo te entregaría las llaves

de mi pecho soberano

Costurerina guapina

ven coser al mio palacio,

que te tengo de poner

en el corredor más alto.

Si los besos que te di

se te volvieran lunares

tendríes na to carina

más de trescientos millares

Toda la noche me tienes

atravesando pinares

para ver en tu ventana

al divino sol que sale

A la fermosura de la persona amada:

Los ojos de mi morena

se parecen a mis males

grandes como mis angustias

negros como mis pesares

Mio morena corta el pelo

en los crecientes de luna

y  yo digo, nun lo cortes

que te llegue a la cintura

Ojos negros, cara blanca

tenía aquella labradora

a mí con ellos me mata

y a todo el mundo enamora.

Tienes unos güeyos neña

tan a la flor de la cara

que parecen dos luceros

de primavera temprana.

Tienes una cinturina

anueche te la medí.

Con vara y media de cinta

catorce vueltes te di

Cuanta ya que los mios güeyos

anden buscando posada.

Agora ya la encontraron

en tu cara resalada.

O al dolor pola ausencia:

Adiós llugarín de Pío.

Adiós molín de La Riera.

Adiós Rosina del alma,

que por ti muero de pena

Amores sí que los tengo.

Amores sí que los vi.

Amores sí que los tengo,

pero no los tengo aquí

Amores sí que los tengo,

pero no los tengo aquí.

Si la vista nun m’engaña,

nun fai muncho que los vi

L'allegría y les ansies por ver a quien se quier:

Cada vez que paso y miro,

y a la ventana nun tas,

voi acortando los pasos

por ver si te asomarás.

Cada vez que paso y miro

y te veo a la ventana,

tengo el corazón alegre

para toda la semana.

O'l esmolecimientu pol bien queríu:

Desde tu casa a la mía

hay una larga cadena,

toda llena de suspiros,

de suspiros toda llena.

Cinco librillas de sangre

me saquen pa que te olvide.

Aunque me dexen sin ella

olvidate ye imposible

Como quieres que la yedra

en el invierno se seque.

Como quieres que yo olvide

a quien he querido siempre

La Plazuela de Barros

Ilesia de Barros 1940

A mediaos de los años sesenta del sieglu XX, tírase l'antigua ilesia parroquial de Barros en Llangréu. Les males condiciones del edificiu sirven de disculpa pa baltar un templu de valor históricu y artísticu y sustituyilo por un edificiu “singular” dientro de lo entendío como “modernu” daquella y que a día de güei, a penes cuarenta años más tarde, sufre de la mesma “aluminosis” que la institución a la que da techu.

So lo qu'antes yera'l frente de la ilesia antigua y lo que güei ye la parte trasera del templu modernu, atópase La Plazuela. Una marquesina pa la parada del autobús  y unos cuantos maceteros y bancos amoblen anguaño la pequena plaza, y l'actividá más destacada qu'acueye, ye'l sirvir de zona de carga y descarga pa la ONG d'ayuda humanitaria de los baxos de la ilesia.

Hasta bien entráu'l sieglu XX los mozos y moces de Barros teníen La Plazuela como llugar d'alcuentru. La mio bisagüela Lisa cuntaba que de mocina axuntábase ellí con otres moces del pueblu los xueves y los domingos pela tarde. Recordaba los xuegos y corros d'entós y como los mozos rondaben el llugar.

Por aquellos tiempos, en redol al 1900 y con aquellos años, unos catorce o quince, les moces entreteníense cantando, faíen xuegos de palmes, saltaben a la cuerda y baillaben al corru y a la xiraldilla.

Pa baillar al corru, Lisa cuntábame que se coyíen de la mano y faíen xirar mientres cantaben la copla inicial y baillaben nel centru, por pareyes alternes nel estribillu, mientres los demás daben palmes acompañando esti conocíu cantar:

Río verde, río verde,

río de tantos colores.

Tantos como lleva el río,

tantos son los mis amores

Que salga la niña que salga el galán,

que salga la niña los dos a bailar.

Que quiera que sí, que quiera que no,

esa morenina la camelo yo,

la camelo yo, con el corazón,

rosina encarnada clavelín de olor,

rosina encarnada y adiós que me voy.

Cuando baillaben a la xiraldilla danciaben de la mano en corru y soltábense a baillar a los estribillos y ente otros, cantaben los sones de:

Anda diciendo tu madre

que tú la reina mereces

y yo como nun soy reina

nun quiero que me cortexes

Nun tabes allí, nun tabes no no

Nun tabes allí que allí taba yo.

O la de:

Nun quiero mozu de Sama

anque tenga reló d’oro

Quiérolu del pueblu Barros

Anque lu tenga de plomo

La mio morena, que nun me aguarde

Que vivo lejos y llego tarde

Y pa rematar gustába-yos soltase pa baillar a lo llixero cantando:

Arriba Manolito

abajo Manolé,

de la quinta pasada

yo te liberé,

de la que viene ahora

yo no se si podré.

Arriba la cafetera

la cafetera con el café.

Per otru llau La Plazuela daba abellu a los grupos de Comedies y Teatru Popular qu'actuaben polos pueblos. Neños y mayores allegaben a estos alcuentros con sielles y bancos dende casa y convertíen la pequena plaza nun peculiar anfiteatru.

Con tou, el mayor protagonismu de La Plazuela, na vida cultural de Barros, produzse el llunes de la fiesta patronal. L'últimu domingu del mes d'agostu celébrense les fiestes de la Purísima Concepción y de llunes el Día de La Concepcionina. Ye nesi día, cuando a la salida de la misa polos cofrades difuntos, entamase en La Plazuela el concursu de baille a lo suelto y a la fin del mesmu, les xentes de Barros  cuéyense de les manos y empiecen la so tradicional Danza.

Pero esto yá ye otra hestoria………………………….